ޢަދާލަތު ޕާޓިގެ ޢިލްމުވެރިންގެ މަޖިލީހުގެ ބައެއް މެންބަރުންނަށް ވަޒީފާގެ ބިރު ދައްކަމުން ދާތީއާއި ވަޒީފާގެ މާޙައުލުގައި ތަފާތު ކުރުން ގެންގުޅޭތީ ނެރޭ ބަޔާން

بِسْمِ ٱللَّٰهِ ٱلرَّحْمَٰنِ ٱلرَّحِيمِ

الحَمْدُ للهِ وَكَفَى، وَالصَّلَاةُ وَالسَّلَامُ عَلَى نَبِيِّنَا الْمُصْطَفَى وَعَلَى آلِه وَصَحْبِهِ وَمَنْ سَارَ عَلَى نَهْجِهِ وَاقْتَفَى. أَمَّا بَعْدُ:

މުވައްޒަުފުން ކުރާ މަސައްކަތް އެއް މިންގަނޑަކުން ވަޒަން ކުރެވުމަކީ ޤާނޫނު އަސާސީގެ 37 ވަނަ މާއްދާއިން ކޮންމެ މުވައްޒަފަކަށް ލިބިގެންވާ ޙައްޤެކެވެ. އަދި ހަމަ އެހެންމެ, މުވައްޒަފެއްގެ ސިޔާސީ ޚިޔާލަށް ނުވަތަ ނިސްބަތްވާ ސިޔާސީ ޕާޓީއަށް ބަލައި އެއްވެސް ތަފާތުކުރުމެއް ގެންގުޅުމަކީ ވަޒީފާއާބެހޭ ޤާނޫނާ ޚިލާފު ކަމެކެވެ.

ޢަދާލަތު ޕާޓިގެ ޢިލްމުވެރިންގެ މަޖިލީހާއި އަދި މަޝްވަރާމަޖިލީހުގެ މެންބަރު އައްޝައިޚް ޙުސައިން އަންޞާރު ވަޒީފާ އަދާކުރައްވަމުން ގެންދަވާ ޙައްޖު ކޯޕަރޭޝަން އިން ޝައިޚް އަންޞާރާމެދު އެތައް ތަފާތުކުރުމެއް ގެންގުޅެ ވަޒީފާ އަދާ ކުރުމުގައި ނުޙައްގު އެތައް ފިޔަވަޅުތަކެއް އަޅާ އަދި ނުޙައްްޤުން ވަޒީފާއިން ސަސްޕެންޑްކުރި ކުރުން ޢަދާލަތު ޕާޓީން ކުށްވެރިކުރަމެވެ. 

ސަރުކާރު ހިންގާ ފަރާތް ބަދަލުވުމުން ސިޔާސީ މަޤާމުތަކުގައި ތިއްބަވާ މުވައްޒަފުން ވަކި ކުރެވުނު ނަމަވެސް ސިޔާސީ ނޫން މަޤާމްތައް ފުރުއްވަމުން އަންނަ މުވައްޒަފުންގެ ސިޔާސީ ވިސްނުމާ ފިކުރަށް ބަލައި ބޭއިންސާފުން ކަންކުރެވިގެން ދިއުމަކީ މި ޕާޓީއިން ބަލައިގަންނާނެ ކަމެއް ނޫނެވެ. މި މައްސަލައިގައި ކަން ހިނގާ ގޮސްފައިވާ ގޮތަށް ބަލާއިރު, އައްޝައިޙްް ޙުސައިން އަންޞާރު ގެ މަޤާމު ދައްކޮށް, މަސައްކަތުން ދުރުކޮށް, ރަސްމީ ގަޑީގައި ދަރިން ސްކޫލަށް ލާން ދިއުމަށް އެހެން މުވައްޒަފުންނަށް ފުރުސަތު ދެވުނު ނަމަވެސް ޝައިޚް އަންޞާރަށް އެ ފުރުސަތު ބަންދުކޮށް, އެކި މަރުޙަލާތަކުގައި ޝައިޚްއާ މެދު ފިޔަވަޅު އަޅާފައިވަނީ ބޭއިންސާފުން ކަމާއި އަދި ފިޔަވަޅު އެޅުމުގައި އެހެން މުވައްޒަފުންނާއި ތަފާތުކުރުން ގެންގުޅެފައިވާކަން ފާހަގަކުރެވެއެވެ.

ޤާނޫނުއަސާސީގެ 37 ވަނަ މާއްދާއިން މުވައްޒަފުން ކުރާ މަސައްކަތް އެއް މިންގަނޑަކުން ވަޒަން ކުރުމަކީ ކޮންމެ މުވައްޒަފަކަށް ލިބިގެންވާ ހައްޤެކެވެ. އަދި ވަޒީފާއާއި ބެހޭ ޤާނޫނުގެ 4 ވަނަ މާއްދާގެ (ހ) އަދި 21 ވަނަ މާއްދާގެ (ށ)ގެ (1) އިން ވަޒީފާއާ ގުޅޭ އެއްވެސް ކަމެއްގައި މީހުންގެ ނަސްލަށް، ކުލަޔަށް، އިޖްތިމާޢީ ނިސްބަތަށް، ދީނަށް، ސިޔާސީގޮތުން ގެންގުޅޭ ޚިޔާލުތަކަށް، ނުވަތަ ނިސްބަތްވާ ސިޔާސީ ޕާޓީއަށް، ޖިންސަށް، ކައިވެނީގެ ނިސްބަތަށް، އާއިލާގައި އަދާކުރާ ޒިންމާތަކަށް، މި ޤާނޫނާއި ޚިލާފުނުވާ ގޮތުން އުމުރަށް، ނުވަތަ ހުރި ނުކުޅެދުންތެރިކަމަށް ބަލައި، މަސައްކަތްކުރާ ހަމަހަމަ މީހުންގެ މެދުގައި އެއްވެސް ގޮތަކުން ތަފާތުކުރުމަކީ މަނާ ކަމެކެވެ. މީގެއިތުރުން، ވަޒީފާއާބެހޭ ޤާނޫނުގެ 21 ވަނަ މާއްދާގެ (ށ) ގެ (7) އިން ވަޒީފާދޭ ފަރާތުން ޤާނޫނާއި ނުވަތަ ގަވާއިދާ ޚިލާފުވެއްޖެ ކަމަށް ތުހުމަތުކޮށް، މުވައްޒަފަކު ޝަކުވާއެއް ހުށަހެޅުން، ނުވަތަ އެފަދަ ޝަކުވާއެއް ހިމެނިފައިވާ މައްސަލައެއްގައި އެއްވެސް ހައިސިއްޔަތަކުން ބައިވެރިވުން އެއީ މަސައްކަތުގެ އަޚްލާޤީ މިންގަނޑަށް މުވައްޒަފަކު ތަބާނުވާކަމަށް ބެލުން، ނުވަތަ މުވައްޒަފަކު އޭނާގެ ވަޒީފާއިން ވަކި ކުރުން މަނާކުރެއެވެ. 

ވީމާ، މިކަން ބައްލަވައި އައްޝައިޚް ޙުސައިން އަންޞާރުގެ ގެއްލިފައިވާ ޙައްޤު ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒަށާއި ކަމާ ބެހޭ އެންމެހައި ފަރާތްތަކަށް ގޮވާލަމެވެ. އަދި ސަރުކާރު މުއައްސަސާތަކާއި ކުންފުނި ތަކަކީ މުވައްޒަފުންގެ ސިޔާސީ ފިކުރަށް ބަލައި ތަފާތުކުރުން ގެންގުޅޭ ތަންތަން ކަމުގައި ނުވާނެކަން ކަށަވަރުކުރައްވައި މި ފަދަ މައްސަލަތައް ތަކުރާރު ނުވާނެ ގޮތަށް ޢަމަލު ކުރެއްވުމަށް ގޮވައިލަމެވެ.