ފަލަސްޠީނުގައި އަނިޔާވެރި ޞަހްޔޫނީން ހިންގަމުންދާ ޖަރީމާތަކާ ދެކޮޅަށް، ދިވެހިރާއްޖޭގައި އަޑު އުފުއްލަވަމުން ގެންދެވި އަލްފާޟިލާ ޢާއިޝަތު ޝާދިޔާ އަދި ޑރ. ޝަޒްރާ އިބްރާހީމް ހައްޔަރު ކުރުން ކުށްވެރި ކުރުން

މަސްޖިދުލް އަޤްޞާ ޙިޞާރުކޮށް، ފަލަސްޠީނުގެ ބިންތައް ފޭރިގަނެ، ފަލަސްޠީނުގެ ނަސްލު ނައްތާލުމަށް ޒަޔަނިސްޓް ޔަހޫދީން ހިންގަމުން ގެންދާ ލާއިންސާނީ އަނިޔާވެރި ޖަރީމާތަކާ ދެކޮޅަށް މެދުކެނޑުމެއްނެތި އަޑުއުފުއްލަވަމުން ގެންދެވި އަލްފާޟިލާ ޢާއިޝަތު ޝާދިޔާއާއި ޑރ.ޝަޒްރާ އިބްރާހީމް ހައްޔަރު ކުރުމާ ވިދިގެން ޢަދާލަތު ޕާޓީއިން ކަންބޮޑުވުން ފާޅުކޮށް އެކަން ކުށްވެރިކުރަމެވެ. އިސްރާއީލާއި އިސްރާއީލަށް ވާގިވެރިވާ ޤައުމުތަކުގެ ޖަރީމާތަކާ ދެކޮޅަށް އަޑު އުފުލުމަކީ ކޮންމެ އިންސާނެއްގެ މައްޗަށް އޮތް އިންސާނީ ޒިންމާއެކެވެ. އަދި ވަކިން ޚާއްޞަކޮށް މަސްޖިދުލް އަޤްޞާގެ ދިފާޢުގައި ކުރެވެން އޮތް ކޮންމެ ކަމެއް ކުރުމަކީ ކޮންމެ މުސްލިމެއްގެ މައްޗަށް އޮތް ދީނީ ވާޖިބެއް ވެސް މެވެ. އަދި ދުނިޔޭގެ އެކި ކަންކޮޅުތަކުގައި މުސްލިމު ނޫން މީހުން ވެސް މި މައްސަލައިގައި، އިންސާނިއްޔަތަށްޓަކައި ވެސް އަޑު އުފުލަމުން ދެއެވެ. ކަން މިހެން އޮތްއިރު ސައްތައިން ސައްތަ މުސްލިމް މި ދައުލަތުގައި އިސްރާއީލާ ދެކޮޅަށް އަޑު އުފުއްލަވަމުން ގެންދެވި ދެ ކަނބަލުން ހައްޔަރު ކުރެވުމަކީ ވަރަށް ނާތަހުޒީބު އަދި ދީނީ ހަމަތަކުން ބެލި ނަމަވެސް ބަލައިގަނެވޭނެ ކަމެއް ނޫނެވެ.  

ދިވެހިރާއްޖެއިން އިސްރާއީލުގެ ޕާސްޕޯޓް މަނާ ކުރަން ނިންމިކަން މުޅި ދުނިޔެއަށް އިޢުލާނުކޮށް އެތައް ސުރުޚީތަކެއް ހަދައި، ފަލަސްޠީނު ރައްޔިތުންނާ މުސްލިމް އުންމަތުގެ މަޤްބޫލުކަން ހޯދުމަށްފަހު އެކަން ނުކުރެވި އުޅުމާއި، ޙަމާސްގެ ލީޑަރު އިސްމާޢީލް ޙަނިއްޔާ ޝަހީދުކޮށްލުމާ ވިދިގެން ރަސްމީކޮށް ދިވެހި ދައުލަތުން ޢަމަލު ކުރެއްވި ގޮތާއި، އިސްރާއީލާ ދެކޮޅަށް އިހުތިޖާޖު ކުރައްވަމުން އައި ދެ ކަނބަލުން ހައްޔަތު ކުރުންފަދަ ކަންކަމުން، ދިވެހި ރައްޔިތުންގެ ހިތްތަކުގައި އިންތިހާ އަށް އަހައްމިއްޔަތުކަން ދެވިފައިވާ މި މައްސަލައިގައި ރައްޔިތުންގެ ވިންދާ ޝުޢޫރާ ދުރަށް ސަރުކާރުން ދަތުރުކުރާކަމަށާއި އަދި ދިވެހި ސަރުކާރުން ފަލަސްޠީނު ޤަޟިއްޔާގައި ޒަމާނުއްސުރެ ގެންގުޅެމުން އައި ރަނގަޅު ހެޔޮ ސްޓޭންޑު ބަދަލުވެފައިވާކަމަށް ބުނުމުގެ ޖާގަ އޮތްކަމުގައި މި ޕާޓީއިން ދެކެމެވެ.  

މި ފުރުޞަތުގައި، މިހިނދުން މިހިނދަށް، އަލްފާޟިލާ ޢާއިޝަތު ޝާދިޔާއާއި ޑރ.ޝަޒްރާ އިބްރާހީމް ދޫކޮށްލައި، ފަލަސްޠީނުގެ ޤަޟިއްޔާގައި ދައުލަތުން ކުރުމަށް ވަޢުދުވެ ވަޑައިގެންފައިވާ ކަންކަން ފުރިހަމަކުރެއްވުމަށް މިޕާޓީގެ ފަރާތުން ގޮވާލަމެވެ.