ގުޅިފައިވާ ޕާޓީތަކުގެ ނޫސްބަޔާން
2023 ވަނަ އަހަރުގެ ރިޔާސީ އިންތިޚާބުގެ ދެވަނަ ބުރުގެ ރީރެޖިސްޓްރޭޝަން މަސައްކަތުގައި ވޭތުވެ ދިޔަ މަދު ދުވަސްތަކުގެ ތެރޭގައި މުޅި ރާއްޖޭގައި ހަރަކާތްތެރިވާ މި ޕާޓީތަކުގެ ހަރަކާތްތެރިންނާއި މިރާއްޖެ އަލުން އަނބުރާ އަނިޔާވެރި އަނދިރި މާޒީގެ ތެރެއަށް ދިއުމަށް ނޭދޭ އާންމު ރައްޔިތުން ކުރި އަދި ކުރަމުންދާ މަސައްކަތަށް ގުޅިފައިވާ ސިޔާސީ ޕާޓީތަކުގެ އުފާވެރި އަމާން ރާއްޖެ ކެމްޕޭނުގެ ފަރާތުން ޝުކުރުވެރިކަމާއެކު މަރުހަބާ ދަންނަވަމެވެ. އަދި މިމަސައްކަތް އިތުރު ޖޯޝާއެކު ކުރިއަށް ގެންގޮސް މިއަދު ހަވީރު 4:00 އާ ހަމަޔަށް ރީ-ރަޖިސްޓަރ ކުރަންޖެހޭ ހުރިހާ ރައްޔިތުން ރީ-ރަޖިސްޓަރ ކުރުމަށް ހުރިހާ ހަރަކާތްތެރިންނާއި ލޮބުވެތި ރައްޔިތުންނަށް ގޮވާލަމެވެ.
އަދި އިދިކޮޅު ސިޔާސީ ފަރާތްތަކުން އިންތިޚާބަށް ނުފޫޒު ފޯރުވުމަށްޓަކައި ރައީސް އިބުރާހީމް މުހައްމަދު ސާލިހަށް ތާއިދުކުރައްވާ ރައްޔިތުން އޮޅުވާލައިގެން ދުރު ސަރަހައްދުތަކަށް ރީ-ރަޖިސްޓަރ ކުރަމުންދާކަމުގެ މައުލޫމާތު ލިބެމުންދާތީ ކޮންމެ ބޭފުޅަކުވެސް އެބޭފުޅަކު ވޯޓުލުމަށް ހަމަޖެހިފައިވަނީ ރަގަޅު ފޮށްޓަށްކަން ކަށަވަރު ކުރެއްވުމަކީ މި ޕާޓީތަކުގެ ވަރަށް ބޮޑު އެދުމެކެވެ. ވޯޓުލުމަށް ރަޖިސްޓަރ ވެފައިވާ ފޮށި ޔަގީންކުރުމަށް VR ޖެއްސެވުމަށްފަހު ހުސްތަންކޮޅެއް ދޫކޮށްފައި އައި.ޑީ.ކާޑު ނަންބަރު ޖެއްސެވުމަށްފަހު 1414 އެސް.އެމް.އެސް ކުރުމުން އެބޭފުޅަކު ވޯޓުލުމަށް ރަޖިސްޓަރވެފައިވާ ފޮށީގެ މަޢުލޫމާތު ލިބިވަޑައިގަންނަވާނެއެވެ. އަދި ތިރީގައި މިވާ ލިންކުންވެސް ރަޖިސްޓްރޭޝަން މަޢުލޫމާތު ޗެކްކުރެވޭނެއެވެ.
އަދި ދަންނަވަމެވެ. މިކެމްޕޭނުގެ ފަރާތުން އިލެކްޝަންސް ކޮމިޝަނުގެ ރީ-ރަޖިސްޓްރޭޝަން މަސައްކަތަށް ނޭދެވޭ ނުފޫޒު ފޯރުވާކަމަށް އިދިކޮޅުފަރާތްތަކުން އަޑުފަތުރަނީ ރިޔާސީ އިންތިޚާބުން ބަލިވާނެކަން އެފަރާތްތަކަށް ޔަގީންވާތީ އިންތިޚާބު ގަޑުބަޑުކޮށްލުމުގެ ބޭނުމުގައެވެ. އަދި މިފަދަ އެއްވެސް ކަމެއް މި ކެމްޕޭނުގެ ފަރާތުން ނުކުރާކަމާއި ނުވެސްކުރާނެކަމުގެ ކަށަވަރުކަން އެންމެހާ ލޮބުވެތި ރައްޔިތުންނަށާއި އިންތިޚާބުގެ ކަންކަން އޮބްޒާވްކުރާ ފަރާތްތަކަށް އަރުވަމެވެ.
__________
17 ސެޕްޓެމްބަރ 2023
