ޢަދާލަތު ޕާޓީ
ޢަދާލަތު ޕާޓީ އަކީ ގިނަ ސިޔާސީ ޕާޓީ އެކުލެވޭ ސިޔާސީ ނިޒާމެއް ރާއްޖެއަށް ތަޢާރަފްކުރެވި ސިޔާސީ ޕާޓީ ރަޖިސްޓްރީ ކުރުމުގެ ފުރުސަތު ހުޅުވައިލެވުމާއެކު އެންމެ ފުުރަތަމަ ރަޖިސްޓްރީ ކުރެވުނު އެއް ސިޔާސީ ޕާޓީއެވެ. 18 އޮގަސްޓް 2005 ވަނަ އަހަރު ރަޖިސްޓްރީ ކުރެވުނު މި ޕާޓީއަކީ މިހާރު ރާއްޖޭގައި ހުއްޓުމެންނެތި ހަރަކާތްތެރިވަމުން އަންނަތާ އެންމެ ގިނަދުވަސްވީ އެއް ޕާޓީއެވެ. ފާއިތުވި 17 އަހަރުގެ މާޒީގައި ޢަދާލަތު ޕާޓީގެ ބައިވެރިވުމާއެކު 4 ސަރުކާރެއް އުފެދިފައިވެއެވެ.
ޕާޓީގެ ލަނޑުދަނޑިތައް
ޢަދާލަތު ޕާޓީއިން ހިންގާ އެންމެހައި ސިޔާސީ ޙަރަކާތްތަކަކީ އަންނަނިވި ލަނޑުދަނޑިތަކަށް ވާސިލުވުމުގެ ގޮތުން ހިންގާ ހަރަކާތެވެ.
ކޮރަޕްޝަން ހުއްޓުވުން
ޚިޔާނަތާއި، ނާޖާއިޒުގޮތުގައި ނުފޫޒު ބޭނުންކޮށްގެން އަމިއްލަ ފާއިދާ ލިބިގަތުމުގެ ނުރައްކާތެރި ވަބާއިން، ދިވެހި މުޖްތަމަޢު ސަލާމަތްކޮށް، ރައްކައުތެރިކުރުން.
ޢަދުލްވެރި ވެރިކަމެއް
ޢަދުލު އިންޞާފުގެ މައްޗަށް ބިނާވެފައިވާ ފުރިހަމަ އިސްލާމީ، ސިޔާސީ، އިޖްތިމާޢީ، އިޤްތިޞާދީ، ޘަޤާފީ، އަޚްލާޤީ ނިޡާމެއް ދިވެހިރާއްޖޭގައި ޤާއިމުކޮށް، ކުރިއަރުވާ، ދެމެހެއްޓުން.
ދީނާއި ޤައުމިއްޔަތު
ދިވެހިރާއްޖޭގައި އިސްލާމީ ވަންތަކަމާއި ދިވެހިވަންތަކަން ހަރުދަނާކޮށް ދެމެހެއްޓުން.
މުންކަރާތް ނަހީކުރުން
ފާޙިޝް ޢަމަލުތަކާއި މުންކަރާތްތަކަށް އިންކާރުކުރުމާއެކު، އެފަދަކަންތައްތައް ހުއްޓުވަން މަސައްކަތް ކުރުމުގެ އިތުރުން، ދިވެހިރާއްޖޭގައި އެފަދަ ކަންކަން އަށަގަތަ ނުދިނުން.
އަމާން މުޖްތަމަޢު
ދިވެހި މުޖުތަމަޢަކީ އެންމެހައި ބާޠިލު ޢަޤީދާތަކާއި، ލާދީނީ އޮއިވަރުތަކުން ރައްކައުތެރިކުރެވިފައިވާ، އަމަންއަމާންކަމާއި، ސުލްޙަމަސަލަސްކަން ޤާއިމުކުރެވިފައިވާ މުޖުތަމަޢަކަށް ހެދުން.
ހެޔޮ ރައްޔިތެއް
އެންމެހައި ދިވެހިންނަކީ އިސްލާމްދީނުގެ ހިދާޔަތުގެ މަތީގައި ސާބިތުވެ ތިބޭ އެކުވެރި، އެއްބައިވަންތަ، އަޚްވަންތަ، އަޚްލާޤުގެ ރިވެތި ސިފަތަކުން ސިފަލިބިގެންވާ، ބަޔަކުކަމުގައި ހެދުން.
ޙައްޤުތައް ކަށަވަރުކުރުން
އިސްލާމްދީނާ އެއްގޮތްވާގޮތުގެ މަތިން ދިވެހި ކޮންމެ ފަރުދެއްގެ އަސާސީ ޙައްޤުތަކާއި، ސިޔާސީ އަދި މަދަނީ ޙައްޤުތައް ލިއްބައިދީ، ޙިމާޔަތްކޮށްދިނުން.
ތަޢުލީމީ މަސައްކަތްތެރި ޖީލެއް
ދިވެހި ދަރިންނަކީ އިސްލާމީ ތަރުބިއްޔަތުގެ އަލީގައި ޒަމާނުގެ ތަޢުލީމު ލިބިފައިވާ، ހުނަރުވެރި، މަސައްކަތްތެރި، ހޭލުންތެރި، ޙަރަކާތްތެރި، މުރާލި ބަޔަކަށް ހެދުން.
ފަސޭހަ ދިރިއުޅުން
ދިވެހި ކޮންމެ ފަރުދަކަށް ދިރިއުޅުމުގެ އަސާސީ ބޭނުންތައް ފަސޭހަކަމާއެކު، އެކަށީގެންވާ ހެޔޮއަގުގައި ލިބޭނެ މަގު ފަހިކޮށްދިނުން.
ދުޅަހެޔޮ މުޖްތަމަޢެއް
ޞިއްޙީގޮތުން ދުޅަހެޔޮ މުޖުތަމަޢަކަށް ދިވެހި މުޖުތަމަޢު ހެދުމަށްޓަކައި، ޞިއްޙީ ދާއިރާ ހަރުދަނާކޮށް ދިވެހި ކޮންމެ ފަރުދަކަށް ފަސޭހަކަމާއެކު ބޭސްފަރުވާ ވެވޭނެ މަގު ތަނަވަސްކޮށްދިނުން.
ފުދުންތެރި ޤައުމެއް
ދިވެހިރާއްޖެއަކީ އިޤްތިޞާދީގޮތުން ފުދުންތެރި، މަދަނީގޮތުންނާއި ޙަޟާރަތުގެ ގޮތުން ކުރިއަރާފައިވާ، ތަހްޒީބު ޤައުމަކަށް ހެދުން.
ޞިނާޢީ ކުރިއެރުން
ޞިނާޢީގޮތުން ކުރިއަށް ގެންދެވެންހުރި ކަންތައްތައް ދެނެގަނެ، ދިރާސާކޮށް، އެފަދަކަންކަން ކުރިއެރުވުން.
