ޅެން: އަލްމަދްރަސަތުލް ޢަރަބިއްޔަތުލް އިސްލާމިއްޔާ
ޢުލޫމީ ޢަރަބި އިސްލާމީ އުޞޫލުން ހިންގަވާ ތަނެކޭ
ސުލޫކީ ހަމަތަކުން ތަރްބިއްޔަތުގެ ބިންގާ އަޅާ ތަނެކޭ
ދަރީންނަށް އެންމެ ބޭނުންވާ އެތައް ރޮނގަކުން ދެވޭ ދަރުސުން
ދަރީން ދެޙަޔާތް އުޖާލާ ކުރުމުގައިމީ ދެއްވި ފުރުޞަތެކޭ
މިގައުމުގެ ޙާލަތާ މުސްތަގްބަލަށް ވިސްނާ ބަލާ ނަމައީ
މިގައުމަށް އެންމެ ބޭނުންވާ އުޞޫލުން ހިންގަވާ ތަނެކޭ
ޢަގީދާ ޞައްޙަ ނޫންގޮތުގައި ދެވުނު ”ތަޢުލީމަ“ކާ ގުޅިގެން
ޙަގީގަތުގައި ވެގެން ދިޔަގޮތް ވަރަށް ހިތި ތަޖުރިބާ ތަކެކޭ
މިގައުމުގެ ކަންކޮޅަށް ފަތުރާ ޢުލޫމުގެ މަންހަޖެއް ކަމުގައި
މިގައުމަށްތީ ނަމޫނާ އެއް ކަމަށް ބެލުމީ އެދޭކަމެކޭ
ބަހާލެވިފައި ހަތަރު ބަޔަކަށް ޚަލީފާއިންގެ ނަންފުޅުގާ
ބަހާ ޢަމަލުން އެތައް ޝަޚްޞިއްޔަތެއް ފެނުމީ އެދޭ ކަމެކޭ
ދިރާސާކޮށް ބަލާނަމައީ ޚަލީފާއިންގެ ޚިދުމަތަކީ
އިރާ ހަނދު ދައުރު ކުރަމުންދާ ހިނދަކު ދެމިހުންނަ ޚިދުމަތެކޭ
އިލާހަށް ބޯލަނބާ ތިބެގެން ރަސޫލާ އަށް ތަބާވުމުގައި
ޚިލާފެއް ނެތް ނަމޫނާ އަށް ވެގެންތިބި ހަރުދަނާ ބައެކޭ
މިދީނާ ގައުމަށާ ޚިދުމަތް ވަފާތެރިކަންމަތީ ކުރުމަށް
މިދީބުގެ ތިޔަކުދީން ތެދުވުން މިއުއްމަތް އެދި ގޮވާ ކަމެކޭ
_ ބެލެނިވެރިއެއް _